Lo 13 de genier 2007 a Limòtges, l’amassada generala dau Forum Sociau Lemosin decidet de sostener la manifestacion de Besièrs dau 17 de març 2007. La diversitat culturala es un tema daus obradors dau FSL dempuei mai de quatre ans. Defendre la lenga e la cultura occitanas emai las autras lengas e culturas que se tròban en Lemosin es pas solament luchar contra la globalizacion, l’uniformizacion culturala e la pensada unica mas tanben dreibir lo desbat sus l’istòria coloniala de l’Estat francés. Volem defendre la lenga occitana perque qu’es la lenga istorica de nòstra region, qu’es la lenga dau trabalh emai de las luchas socialas. Volem defendre totas las autras lengas e culturas dau Lemosin perque volem ’na diversitat culturala sens comunautarisme, sens replec sus se, dins la dubertura a l’autre e lo dialògue interculturau. Volem de las culturas vivas de pertot dins lo monde, per los pòples akha, kishwa, bogi, pataxó, palestinian emai chas nos. Tendrem de trabalhar per un monde e un Lemosin liberats de tota fòrma d’imperialisme, economic o culturau.

Lo FSL es un Forum Sociau permanent. Bota en malhum 1500 personas e mai de 200 associacions. Permanent vòu dire que i a daus obradors que trabalhen tota l’annada e de las amassadas regularas. I a de segur un moment de rescontres mai important chasqua annada. Lo darrier còp eran 800 sus ’na setmana entera. I a 4 obradors : - Solidaritat internationala - Diversitat culturala e lingüistica - Reconneissança de las identitats, - Agricultura - Consomacion - Decreissença - Un autre biais de viure, - Democracia - participacion ciutadana, - Servicis publics.

Perque lo FSL s’interessa a l’occitan e a las luchas culturalas ? Quand ai perpausat de trabalhar sus lo tema de la diversitat culturala e de la situacion de la cultura occitana, lo monde que animavan l’obrador sus la solidaritat internacionala fugueren interessat. Avem decidat de far un debat sus lo tema : Drechs daus pòples autoctònas e diversitat culturala. L’idéia era de ’visar çò que passa en America dau Sud, las caracteristicas de las mobilizacions daus pòples indians que son per la vetz identitarias, revolucionarias e democraticas, de veire la revendicacions daus pòples dins los Estats dau Nòrd per construir ’n’alternativa, ’n’emancipacion sociala qu’obluda pas las identitats... Per que i a un liam entre luchas culturalas o identitarias, socialas e ecologicas. Qu’es çò que se passa coma Evo Morales en Bolivia, en Oaxaca au Mexic, en Lengadòc per lo vin en 2007, coma en 1907. Avem pas ’gut lo temps de ’chabar lo debat. Cotunha ujan.

’N’autra ideia es venguda pendant lo debat : coma surtir l’occitan de l’escòla, coma far viure la cultura dins la societat. Volem trabalhar sus quela question emb d’associacions d’un quartier popular, malurosament plan conegut dempuei de la Nadau : Beubrelh. Quartier ente i a ’gut lo murtre d’un jòune que fasiá dau quad. L’idéia es de veire coma far per que totas las culturas minorizadas dau Lemosin sian visiblas, sian presentas dins la societat, dins la vita de la region e de la gent.

Volem construir un monde ente chasqua femna, chasque òme a sa plaça, lo drech de viure, de minjar, de trabalhar mas tanben de viure dins sa cultura. E construir l’interculturalitat per que las culturas, las lengas, sian p’un piau daus mianadís mas daus ponts d’una gent l’autra.

infos : http://fslimousin.free.fr/